'Váikkuheapmi - hástaleapmi - ovdáneapmi'Vuoi dan Kárenina ja Mu ártegis eallin váldopersovnnaid ovdáneapmi sosiála oktavuođain

摘要

Dutkamušastan guorahalan Vuoi dan Kárenina ja Mu ártegis eallin váldopersovnnaid ovdáneami. Dutkančuolmma juogán golmma váldooassái; váldopersovnna-, váikkuheaddji- ja ovdáneami guorahallamii. Váldopersovnna guorahallamis geahčadan persovnnaid siskkáldas ja olgguldas iešvuođaid. Guktuid teakstadujiin lea váikkuheaddji, nu gohčoduvvon katalysáhtor, guhte váikkuha sihke persovnnaid ja muitalusa juona. Oainnán ávkkálažžan váldopersovnna ovdáneami guorahallamis čiekŋudit katalysáhtora iešvuođaide, guorahallan dihtii váikkuheaddji doaimma. Muitalusaid váldopersovnnat váikkuhuvvojit maiddái birrasa sosiála oktavuođain. Biras lea hábmejuvvon ollesolbmuid norpmaiguin, mat ráddjejit ja gáržžidit mánáid doaimma. Loahpalaččat suokkardalan váldopersovnna ovdáneami katalysáhtora váikkuhemiin, ja mo fápmorollaid hástaleapmi sosiála- ja servodatoktavuođain váikkuha ovdáneapmái. Guorahallamis lavttán teavstta ja konteavstta, go guorahalan teakstaelemeanttaid konteavsttalaš vuođuin. Teakstaanalyhtalaš reaiddut ja kultuvrralaš konteaksta leat dutkosa metodalaš lahkonanvuogit. Teakstaanalyhtalaš guorahallamii geavahan maiddái teoriijaid mat sámi perspektiivvas gieđahallet bajásgeassima, birgejumi, ja humor- ja skelbmošanárbevieru. Sámi teoriijaide lavttán maiddái eará teoriijaid mat gieđahallet teakstalahkoneami, sosiála oktavuođaid doaimma ja humorgeavahusa. Ovdamearkan leat etnokritihka jurddašeapmi, normalitehta, karneválateoriija ja oarjemáilmmálaš humoráddejupmi. -Váldopersovdna guorahallan-Sámi mánáidgirjjálašvuohta-Katalysáhtor-Fápmorollat-Sámi bajásgeassin-Humor-Karnevála-Normalitehta-Etnokritihkka