Резултатите од клиничко-биохемиските анализи имаат незаменлива улога во поставувањето на дијагнозата, како и следењето на текот на болеста и ефектите од терапијата кај бројни заболувања. Многу често овие резултати претставуваат една од клучните информации за донесување одлука за понатамошниот третман на пациентот. Од тука произлегува одговорноста на сите чинители вклучени во работата и менаџирањето на клиничко-биохемиските лаборатории (целокупниот лабораториски персонал, раководителите на лабораториите, како и раководителите на здравствените организации) да посветат особено внимание на квалитетот на работeњето на овие лаборатории и нивниот краен производ – резултатите од изработените анализи.udМеѓународниот стандард ISO15189 ги пропишува критериумите за управување со квалитет во медицинските лаборатории, каде внатрешната и надворешната контрола на квалитетот на резултатите претставуваат само едни од бројните аспекти на комплетниот систем за управување со квалитет (TQM – total quality management).udДодека секојдневната внатрешна контрола на квалитетот на резултатите во клиничко-биохемиските лаборатории е фокусирана исклучиво на самата лабораторија, суштината на надворешната контрола на квалитет се состои во компарација на перформансите на различни лаборатории, при тоа земајќи ги предвид спецификите на применетите методи и анализатори. Периодичните извештаи (овој тип на контрола вообичаено се спроведува еднаш месечно) даваат информација за точноста на резултатот за секој аналит, а годишниот извештај, освен сумарната статистичка анализа, содржи и информација за рангирањето на лабораторијата, како глобално, така и на ниво на земјата.udПостојат неколку комерцијални надворешни контроли на квалитет кои покриваат широка палета на стандардни биохемиски и имунохемиски методи, а од неодамна ваков тип на контрола постои и за хематолошките анализи.udИако со примената на надворешната контрола на квалитет значително се зголемува сигурноста во издадените резултати, сепак овој концепт не обезбедува континуирана контрола. Како резултат на овие согледувања, а овозможено со напредокот на информатичката технологија, во светот се развиени програми за меѓулабораториска споредба на резултатите кои овозможуваат континиурано следење и проценка на квалитетот на резултатите во реално време. Ваков тип на контрола е достапен и во Република Македонија, а неговото имплементирање во лабораториите во поголем број здравствени установи ќе претставува значаен чекор напред во обезбедување на повисок стандард на здравствена грижа за населението.ud
展开▼